Mustaqil davlatlar hamdo‘stligi davlatlararo tashkiloti rahbariyatidan iborat delegatsiya “Gʻalaba bog‘i” yodgorlik majmuasida bo‘lishdi.

Har bir davlatning o‘z tarixi va o‘tmishi bor ekan, buguni va ertasi ham davomiy bo‘ladi. O‘tmishda yashab o‘tgan ajdodlarning qoldirgan ezgu ishlari, boy madaniy va ma’naviy me’roslari esa, avlodlar uchun ibrat va hayot yo‘llarini yorutguvchi mash’ala bo‘lib xizmat qiladi.

Yurtimizda “Tarixni chuqurroq anglamay turib, buyuk kelajakni barpo etib bo‘lmaydi” zaylida qator ezgu ishlar amalga oshirilgan bo‘lib, uni birgina “Gʻalaba bog‘i” yodgorlik majmuasi misolida ko‘rishimiz mumkin. Ushbu maskanga tashrif buyurayotgan yurtdoshlarimiz, yoshu keksalar, qolaversa xorijiy mehmonlar huddi o‘zlarini tarixga sayohat qilgandek his qilishadi. Jumladan, kuni kecha Mustaqil davlatlar hamdo‘stligi–davlatlararo tashkiloti rahbariyatidan iborat delegatsiya ham “Gʻalaba bog‘i” yodgorlik majmuasi hamda “Shon-sharaf” davlat muzeyiga qilgan sayohati chog‘ida mazkur majmuani “Jonli tarix”– deya e’tirof etishdi. Ikkinchi jahon urushi davriga oid noyob eksponat va ekspozisiyalar mehmonlarda katta taassurot qoldirdi.
– Ushbu maskan nafaqat tarixga va ajdodlarga bo‘lgan chuqur hurmat va ehtirom, balki, yurtingiz yoshlarini yanada komil va vatanparvar bo‘lib voyaga yetishlarida katta ahamiyat kasb etadi, -deya ta’kidlagan delegatsiya a’zolari, olgan taassurotlari va samimiy tilaklarini esdalik sifatida yozib qoldirishdi.