Dastlabki harbiy unvonlar topshirildi

Poytaxtimizdagi “Gʻalaba bogʻi” yodgorlik majmuasida joylashgan “Shon-sharaf” davlat muzeyida bir guruh oddiy askar va serjantlarga “leytenant” boshlangʻich ofitserlik harbiy unvoni berildi. Mudofaa vazirining tarbiyaviy va mafkuraviy ishlar boʻyicha oʻrinbosari polkovnik Hamdam Qarshiyev Chirchiq oliy tank qoʻmondonlik-muhandislik bilim yurti qoshidagi ofitserlarni tayyorlash kursini bitirgan navbatdagi harbiy xizmatchilarga ofitserlik unvoni va guvohnomasini tantanali tarzda topshirdi. Ofitser degan sharafli nomga ega boʻlgan barcha bitiruvchilarni samimiy qutladi.

Tadbirda soʻzga chiqqanlar keyingi yillarda tor ixtisoslik boʻyicha oliy fuqarolik maʼlumotiga ega boʻlgan oddiy askar va serjantlarni ofitserlik lavozimlariga tayinlash va ularga ofitserlik harbiy unvonini berish holati sezilarli darajada oshganini taʼkidladi. Tor doiradagi mutaxassislik boʻyicha lavozimlarni sohaga oid oliy fuqarolik maʼlumotiga ega boʻlgan oddiy askar va serjantlar hisobidan butlash tartibi tizimlashtirilgani alohida qayd etildi.

Bu esa muayyan yoʻnalishlar boʻyicha lavozimlarni oʻzining munosib mutaxassislari egallashiga xizmat qilmoqda.

— Bugun zimmamdagi masʼuliyat ikki hissa oshdi, — deydi leytenant Rustam Gʻafurov. — Chunki bugundan boshlab harbiy xizmatga ofitser sifatida kirishaman. Vatan himoyachisi ekanman, yurt tinchligi, mamlakatimiz daxlsizligini taʼminlash uchun bor kuch-gʻayratim va bilimimni ayamayman.