“Gʻalaba bog‘i” yodgorlik majmuasida uch avlod uchrashuvi bo‘lib o‘tdi

Olmazor tumani Hokimligi, tuman “Nuroniy jamoatchilik kengashi” va “Gʻalaba bog‘i” yodgorlik majmuasi bilan hamkorlikda uch avlod uchrashuvi bo‘lib o‘tdi. O‘zbekiston Respublikasi Mustaqilligining 30 yilligi munosabati bilan tashkil etilgan ushbu tantanali marosimda Keksa, o‘rta va yosh avlod vakillari ishtirok etdi. Tadbirda elimiz suygan san’atkorlar tomonidan ijro etilgan musiqiy chiqishlar kechaga o‘zgacha kayfiyat ulashdi. Shuningdek, tadbir davomida mamlakatimiz rivojiga ulkan hissa qo‘shib, hozirda keksalik gashtini surayotgan nuroniylar hamda bugungi kunda turli jabhalarda faol ishtiroki bilan barchaga o‘rnak bo‘lib kelayotgan yurtdoshlarimiz hamda iste’dodli yoshlarga esdalik sovg‘alari topshirildi.

Shu o‘rinda ta’kidlash joizki, Mustaqillik yillarida ko‘p millatli O‘zbekiston xalqi o‘zining salohiyati, mustahkam irodasi va matonatini namoyon etib, sinovli va mashshaqqatli kunlarni yengib, ulkan taraqqiyot yo‘lini bosib o‘tdi. So‘nggi yillarda jamiyatimizda tinchlik va barqarorlikni, fuqarolar va millatlararo hamjihatlik muhiti kun sayin mustahkamlanib bormoqda. Shuningdek, so‘nggi 5 yil davomida yangi O‘zbekistonni barpo etish maqsadida, har jabhada keng ko‘lamli islohotlar amalga oshirilmoqda. Bu esa, mustahkam kelajak barpo etishdek buyuk maqsadlarni amalga oshirishdagi muhim qadamlardan sanaladi.