ENG MUHIMI QАLB KOʼZI RАVSHАN BO‘LSIN

Poytaxtimizning Sergeli tumanida joylashgan ko‘zi ojizlar jamiyati bo‘linmasi tomonidan “G‘alaba bog‘i” yodgorlik majmuasiga uyushtirilgan safar chog‘ida nuroniylar mazkur maskan yurt farovonligi uchun nechog‘lik muhim ekanligini taʼkidladilar. Ular majmuadagi har bir hudud va “Shon-sharaf” davlat muzeyidagi eksponatlarni mehr bilan kuzatar ekan, O‘zbekiston xalqining naqadar bag‘rikeng va matonatli ekani, shu bilan birga, shu muqaddas zaminda tug‘ilib voyaga yetganliklariga shukronalar keltirib, yurtimizda har jabhada erishilayotgan yutuq va amaldagi islohotlarda mamlakat tinchligi va xalq farovonligidek buyuk maqsadlar mujassam ekanligini taʼkidladilar.

– “G‘alaba bog‘i” bugungi kunda xalqimizning eng sevimli dargohiga aylandi desam mubolag‘a bo‘lmaydi. Garchi ko‘zimiz ojiz bo‘lsada, ota-bobolarimizning naqadar bag‘rikeng, yuksak matonat va jasorat egasi ekanliklarini yuragimizdan his etdik. Bu maskan bilan tanishar ekanmiz, qalb ko‘zimiz quvonchdan yig‘ladi. Yurtimiz tinchligi abadiy bo‘lsin, Prezidentimiz boshlagan sof va ezgu maqsadlardan bunyod etilayotgan buyuk yo‘l mustahkam va bardavom bo‘lsin, – deydi Sergeli tuman, ko‘zi ojizlar jamiyati bo‘linmasi rahbari Аbdumannon Fattohov.