Mehmonlar tarkibida bir necha kosmonavt-uchuvchilar, xususan, asli o‘zbekistonlik afsonaviy fazogir Vladimir Jonibekov va o‘zbek o‘g‘loni Solijon Sharipov ham bor. Tashrif davomida mehmonlar Qarshi shahrida joylashgan O‘zbekiston Respublikasi oliy harbiy aviatsiya bilim yurtida bo‘lishdi. U yerda kursantlarning taʼlim olishi va uchuvchilik sir-asrorlarini chuqur oʼrganishi uchun yaratilgan shart-sharoitlar bilan yaqindan tanishdi. Shuningdek, O‘zbekiston Respublikasi Qurolli Kuchlari akademiyasida delegatsiya aʼzolari bilan uchrashuv bo‘lib o‘tdi. Unda davlat va jamoat tashkilotlari vakillari, olimlar, professorlar, madaniyat xodimlari, senator va deputatlar, shuningdek, akademiya jamoasi ishtirok etdi. Mazkur tadbirda Mudofaa vaziri general-leytenant Bahodir Qurbonov so‘nggi yillarda yurtimizda amalga oshirilayotgan keng ko‘lamli islohotlarga to‘xtalib o‘tdi. Rossiya Federatsiyasi bilan yurtimiz o‘rtasidagi rivojlanib borayotgan ikki tomonlama istiqbolli hamkorlik har ikki davlat rivoji uchun ulkan hissa qo‘shishini alohida taʼkidladi. Tashrif doirasida delegatsiya aʼzolari Toshkent shahrida qad rostlagan “G‘alaba bog‘i” yodgorlik majmuasi hamda uning tarkibidagi “Shon-sharaf” davlat muzeyiga sayohat qilib, Ikkinchi jahon urushida qozonilgan buyuk g‘alabaga o‘zining munosib hissasini qo‘shgan vatandoshlarimizga taalluqli bo‘lgan noyob eksponatlar bilan yaqindan tanishdilar. Shundan so‘ng, “Shon-sharaf” davlat muzeyidagi faxriy mehmonlar kitobiga o‘z taassurotlarini yozib qoldirishdi va “Ikkinchi jahon urushi havo desant qo‘shinlari qo‘mondonlari” nomli kitobni sovg‘a qilishdi.